بھارت کی خوشی میں اسرائیل خوش۔۔۔فاطمہ بھٹو برہم

ویب ڈیسک(یہ پاکستان)کرکٹ ورلڈ کپ کے میچ میں پاکستان کو شکست دینے پر بھارت کو اسرائیل کی جانب سے مبارک دئیے جانے پر فاطمہ بھٹو نے برہمی کا اظہار کرتے ہوئے کہا ہے کہ نسل کش ریاست کھیل کی جیت پر خوش ہو رہا ہے۔
پاکستان اور بھارت کے درمیان 14 اکتوبر کو بھارتی ریاست گجرات کے شہر احمد آباد میں میچ کھیلا گیا تھا، جس میں پاکستانی ٹیم کو شکست ہوئی تھی۔روایتی حریف کے ہاتھوں قومی ٹیم کی شکست پر پاکستانی سیاست دانوں، سماجی رہنماؤں اور کرکٹ شائقین نے بھی پاکستانی کھلاڑیوں پر تنقید کی تھی۔
تاہم بھارت کی جیت پر اسرائیلی حکومت کے ٹوئٹر ہینڈل سے انڈیا کو مبارک باد دی گئی تھی، جس پر دیگر افراد اور شخصیات کی طرح فاطمہ بھٹو نے بھی اپنا رد عمل دیا۔اسرائیلی حکومت کے ٹوئٹر ہینڈل سے بھارت کی جیت سے متعلق کی گئی ایک ٹوئٹ کو ری ٹوئٹ کرتے ہوئے فاطمہ نے سخت رد عمل دیا۔اور لکھا کہ صیہونی ریاست اپنے دوست ملک بھارت کی کرکٹ میچ کی جیت پر خوش ہے۔اسرائیلی حکومت کی جانب سے جس ٹوئٹ کو شیئر کیا گیا، اس میں ایک بھارتی کرکٹ مداح کو میچ کے دوران اسرائیل کے حق میں بینر کے ساتھ دکھایا گیا تھا۔کرکٹ مداح کی جانب سے بھارتی وزیر اعظم نریندر مودی اور اسرائیلی وزیر اعظم نیتن ہایو کی ایک دوسرے سے ہاتھ ملانے کی تصویر کا پلے کارڈ اٹھا رکھا تھا، جس میں درج تھا کہ بھارت اپنے دوست اسرائیل کے ساتھ کھڑا ہے۔
فاطمہ بھٹو نے لکھا کہ فلسطینیوں کی نسل کشی کرنے والی ریاست کھیل کی جیت پر خوش ہو رہی ہے جو کہ محض سات دن میں 724 سے زائد بچوں کو موت کی نیند سلا چکی ہے۔